2007年3月13日 星期二

調派生涯--(四)之超低能、勁搞笑

  說完了大事件,不如說說搞笑事。做控制組每日接幾百個電話,當中不乏真正緊急求助,但亦有不少可笑事件,以下就是我和一些同事的經歷:

一.我阿媽飛左落街-有個報案人話「我阿媽飛左落街」,消防及救護車到場後,才知道同事聽錯了,是「我隻貓飛左落街」。

二.My kid stranded on the roof-同類事件,有個外傭話「My kid stranded on the roof, help!」,原來又是聽錯了,是「My CAT stranded on the roof」!

三.有個有精神病紀錄的女人狂叫:「我俾人呃呀!」
  我自己:「咁你俾個電話號碼我丫?」
  她說:「你想聽中文定英文呀?」
  我說:「中文啦,我地中國人嘛!」
  她用普通話說:「二三八三 xxxx」...

四.有個人打投訴熱線,嚷著:「我要投訴消防員包二奶!」

五.又有個人打投訴熱線,大叫:「我要投訴個救護員XX,佢係條街度大叫我個名!」

六.有個人話:「我要救護車」

  同事話:「你畀個地址我啦!」
  
  報案人話:「『聽日先呀!』」
  同事話:「無得聽日先架喎,我地係緊急救護車,即刻0黎0架!」
  報案人話:「唔係呀,『聽日先呀!』」
  同事話:「都話無得聽日先咯!」
  ....講左五分鐘,原來個報案人係話-「天逸村」!

七.阿婆話自己係「鴨脷洲死蠢」...其實係「鴨脷洲西村」!

八.有個人,成日報假案,話「南安佛堂」有火,當然搵唔到,佢就會打去主管到投訴。
  以上笑話,笑中有淚,未能盡錄,文字亦不能得其神髓,還請見諒。(待續)

沒有留言:

張貼留言

注意:只有此網誌的成員可以留言。